“Në lidhje me disa eshtra të gjetura dhe të dorëzuara në Institutin e Mjekësisë Ligjore nga familjarë të viktimave të Regjimit Komunist, Drejtoria e Policisë së Qarkut Tiranë, sqaron opinionin publik se:
Eshtrat janë gjetur nga familjarë, në një luginë në fshatin Qerret Komuna Dajt, në afërsi të vendstrehimit për kohë lufte të Ish Komitetit Ekzekutiv Tiranë”, tha policia në deklaratën e saj.
Sipas Drejorisë së Policisë Tiranë, në kqyrjen e vendit të gjetjes së këtyre eshtrave, përveç eshtrave të gjetura nga famijarët, sot më datë 8 shkurt 2010 u gjetën edhe një kafkë njeriu, e cila u dërgua për ekzaminime të mëtejshme në Institutin e Mjekësisë Ligjore.
Burimet e policisë sqarojnë se për hetimin e ngjarjes, janë pyetur në cilësinë e personit që ka dijeni për rrethana të hetimit, pjesëtarë të familjeve të viktimave të ish-Rregjimit Komunist, që kanë bërë kërkime për gjetjen e të afërmëve të tyre të pushkatuar.
“Nën drejtimin e Prokurorisë së Rrethit Gjyqësor Tiranë dhe në bashkëpunim me Institutin e Mjekësisë Ligjore, vazhdon puna për kqyrjen e të gjithave eshtrave dhe mbetjen kockore, të cilat ndodhen në Morgun e Tiranës”, vijon deklarata.
Sipas saj, po vazhdon puna, për kryerjen e të gjitha ekzaminimeve kriminalistike, mjekoligjore dhe antopologjike, për identifikimin e tyre.
Policia thotë se nga deklarimet paraprake, bëhet fjalë për skeletet e 19 –të personave të ekzekutuar në periudha të ndryshme në kohën e Regjimit Komunist. (Lajmifundit)
