Hetuesit e Drejtorisë së Hetimeve të Krimeve Ekonomike dhe Korrupsionit nga Njësia e hetimeve rajonale në Prishtinë me urdhër të Prokurorit të Qarkut kanë bërë arrestimin e dy personave të dyshuar A. D. 1972 shtetas i Bosnjës dhe Kroacisë ( Dyshtetësi) dhe A. K. 1962 shtetas i Republikës së Kosovës, për shkak të dyshimit të bazuar se kanë kryer veprën penale Falsifikim i dokumentit zyrtar dhe mashtrim në detyrë në bashkëpunim.
Arrestimi i personave të dyshuar është realizuar si vazhdimësi e hetimit të rastit disa javore në kërkim të provave dhe elementeve tjera të nevojshme për inicim të procedurës penale ndaj të dyshuarve për përfshirje në veprat penale falsifikim i dokumentit zyrtar, mashtrim në detyrë dhe bashkëpunim.
Rrethanat e rastit janë se të dyshuarit e lartpërmendur kanë arritur që në bashkëpunim dhe në mënyrë të kundërligjshme të falsifikojnë fatura dhe të njëjtat i kanë evidentuar në librat përkatës të blerjes dhe të shitjes në emër të firmës Grunaja-Suharekë, duke llogaritur tatimin në vlerën e shtuar –TVSH, me të cilën në mënyrë të pavërtetë dhe pa bazë juridike kanë llogaritur shumën e parave “të TVSH-se” të cilën me rastin e eksportit që ka bërë e ka realizuar rimbursimin nga ana e ATK-duke realizuar këto mjete dhe në emër të kësaj ka përfituar shumën prej 71.288,23 euro në dëm të buxhetit të Republikës së Kosovës.
Të gjitha faturat e blerjes për të cilat dyshohet se janë fictive, ato janë të përpiluara në emër të firmave që kanë selinë në pjesën veriore të Mitrovicës.
Pas konsultimit me prokurorin e prokurorisë së qarkut të dyshuarit janë dërguar në qendrën e paraburgimit ndërkohë që janë duke u përgatitur të gjitha procedurat penale ndaj tyre. (Lajmifundit)
