FSHF jep lajmin e keq: Në pikëpyetje përfundimi i stadiumit “Arena Kombëtare”

Sport

Federata Shqiptare e Futbollit ka publikuar një lajm aspak të mirë për sportdashësit shqiptarë. Në njoftimin e shpërndarë në faqen zyrtare të Federatës thuhet se “Komisioni i Apelit refuzon të rimbursojë TVSH-në për pjesën e investimit të kryer nga FSHF në stadiumin “Arena Kombëtare”.

Kjo sipas organit më të lartë të futbollit, ngre pikëpyetje për përfundimin e ndërtimit të stadiumit.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

Federata mes tjerash thekson se do t’i drejtohet gjykatës për çështjen në fjalë, ndërsa nuk ngurron të sulmojë edhe një grup burokratësh sipas saj, për të cilët thotë se nuk iu ka dalë ende mërzia pasi Tirana po fiton një stadium modern.

“Nga Ministria e Financave vjen një lajm tjetër: Komisioni i Apelit refuzon të rimbursojë TVSH-në për pjesën e investimit të kryer nga FSHF në stadiumin “Arena Kombëtare”. Kjo do të thotë që këtij investimi i mungojnë afërsisht 2 milionë Euro dhe se praktikisht përfundimi i punimeve të stadiumit vihet seriozisht në pikëpyetje.

Në bazë të VKM Nr.953, datë 29/12/2014, neni 5, pika 5, Qendra Sportive Kuq e Zi, ka bërë deklarimet kronologjike në librat e blerjes dhe shitjes të TVSH-së, duke konsideruar dhe deklaruar se qiradhënia e ardhëshme do të jetë e tatueshme. Këtë shpjegim nuk po e bëjmë për Komisionin e Apelit që sillet si një grup “tifozësh ultras”, por për ata që e dinë dhe e kuptojnë këtë procedurë ligjore.

Gjithsesi FSHF do ti drejtohet Gjykatës, për këtë çështje, por është për të ardhur keq se si një grup burokratësh të shtetit dhe të politikës, ende nuk ju ka dalë mërzia, që Shqipëria u kualifikua në “EURO 2016”, dhe janë akoma më të mërzitur që Tirana po bëhet me një stadium modern”, përfundon njoftimi.

ME TE LEXUARAT