Reportazhi i “RAI 3” per drogen/ Salianji: Rama, mbrojtes i boseve te krimit

Politikë
Reportazhi i “RAI 3” per drogen/ Salianji: Rama, mbrojtes i boseve

Ish-deputeti i Partisë Demokartike, Ervin Salianji deklaroi këtë të martë se reportazhi i televizionit italian “Rai3” tregoi se Shqipëria vijon të jetë “Kolumbia e Evropës”.

Sipas tij, shifrat e larta të kanabisit faktoi që shteti ndodhet në duart e krimit, ndërsa shtoi se propaganda e kryeministrit Rama nuk ka mundur të mbulojë dot realitetin se Shqipëria është prodhuese e drogës.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

Ndër të tjera, ish-deputeti u shpreh se Rama dhe Sandër Lleshaj kanë dështuar në plotësimin e një prej kushteve kryesore të Bundestagut për nisjen e negociatave, e cila është “lufta kundër krimit të organizuar”.

“Dëshmia e sjellë nga Rai 3 dëshmon dështimin e Edi Ramës dhe Sandër Lleshajt në plotësimin e një prej kushteve kryesore të Bundestagut për nisjen e negociatave- luftën kundër krimit të organizuar. Në Shqipëri, krimi i organizuar jo vetëm nuk po luftohet, por, i mbrojtur nga partia në pushtet, është shndërruar në lojtar kryesor në trafikun ndërkombëtar të narkotikëve.

Prej 6 vjetësh, nuk ka asnjë bos të krimit të organizuar në burg. Nuk ka asnjë bos të trafikut të drogës të arrestuar. Burgjet e Sandër Lleshajt kanë mbushur me opozitarë që protestojnë kundër qeverisë së lidhur me krimin dhe me të varfër që punojnë parcelat me kanabis.

Bosët janë të gjithë të lirë, sepse i sigurojnë Edi Ramës para për të blerë votat dhe për të mbajtur në këmbë projektin e tij për vjedhjen e zgjedhjeve dhe kapjen e drejtësisë.

Reportazhi i Rai 3 rrëzon propagandë prej miliona eurosh të qeverisë se ajo e ka asgjësuar kanabisin. Vetëm pak ditë më parë u kapën në Greqi 1.2 ton drogë, ndërsa në brigjet italiane kjo është një ngjarje e zakonshme.

Është e qartë favorizimi i hapur që i bën Rama trafikantëve të drogës për interesit e tij personale politike, është e qartë për këdo që me Edi Ramën në qeverisje fëmijët në shkolla gjejnë më lehtësisht kanabis se stilolapsa, se me Ramën biznesi kriminal i drogës po mbyt çdo konkurrencë dhe mundësi që biznesi i ndershëm të ngrejë kokë, se me Ramën në qeveri te arsimuarit të shkolluarit nuk kanë të ardhme, është e qartë se rendi dhe siguria publike, jeta dhe prona e qytetarëve është e pasigurt prej bandave dhe kriminelëve të veshur me pushtet”.

Ndërkohë, Salianji nënviozi se lufta ndaj krimit është prioriteti kryesor i Partisë Demokratike.

“Ne jemi të vendosur ta shkërmoqim krimin e organizuar, lidhjet e tij me politikën dhe të çojmë para përgjegjësisë penale çdo bandit, qoftë ai Kryeministër, deputet, kryetar bashkie apo bos i krimit të organizuar”.

ME TE LEXUARAT