‘Lufta do të përfundojë kur të dua unë”, Trump: Nuk ka më objektiva për të goditur

Presidenti i Shtetet e Bashkuara të Amerikës, Donald Trump, deklaroi se lufta me Iran mund të përfundojë së shpejti, duke theksuar se operacionet ushtarake amerikane kanë arritur pothuajse të gjitha objektivat e tyre.

Në një intervistë telefonike për Axios, Trump u shpreh se kanë mbetur vetëm disa objektiva të izoluar dhe se përfundimi i konfliktit varet nga vendimi i tij.

“Kanë mbetur shumë pak gjëra këtu e atje. Sa herë që dua të mbarojë, do të mbarojë”, deklaroi ai.

Megjithatë, sipas raportimeve, zyrtarë amerikanë dhe izraelitë kanë bërë të ditur se deri më tani nuk është dhënë asnjë urdhër i brendshëm për ndërprerjen e operacioneve ushtarake.

Nga ana tjetër, ministri i Mbrojtjes i Izrael, Israel Katz, tha se operacionet do të vazhdojnë për një periudhë të pacaktuar, derisa të arrihen të gjitha objektivat dhe të sigurohet ajo që e quajti një fitore vendimtare.

Trump konfirmoi gjithashtu se sulmet amerikane të zhvilluara të martën shkatërruan 16 anije që sipas tij përdoreshin për vendosjen e minave detare, duke penguar planet e Iranit.

Presidenti amerikan theksoi se forcat e SHBA-së po vazhdojnë operacionet me fuqi të madhe ushtarake dhe se aftësitë ushtarake të Iranit janë dobësuar ndjeshëm, ndërsa sulmet iraniane me raketa dhe dronë janë reduktuar ndjeshëm.

Sipas tij, operacionet ushtarake po zhvillohen më shpejt nga sa ishte parashikuar fillimisht dhe kanë shkaktuar më shumë dëme sesa ishte menduar në planin fillestar gjashtëjavor.

“Lufta po shkon jashtëzakonisht mirë. Jemi shumë përpara afatit dhe kemi shkaktuar më shumë dëme sesa mendonim të ishte e mundur”, u shpreh Trump, duke shtuar se Irani tani po përballet me pasojat e veprimeve të tij ndër vite./Shqip