“Për ne është një lojë, nuk është ndonjë gjë e madhe”, Trump trondit me deklaratën për luftën në Iran

Presidenti i SHBA-së, Donald Trump, ka minimizuar ndikimin e konfliktit me Iranin në Shtetet e Bashkuara, ndërsa vendi i afrohet zgjedhjeve të rëndësishme të mesit të mandatit.

I pyetur nga gazetarët në Zyrën Ovale për deklaratat e zëvendëspresidentit J.D. Vance, i cili një ditë më parë tha se nuk do ta quante konfliktin në Iran një “luftë”, Trump u shpreh se bëhet fjalë për një konflikt ushtarak dhe jo për një luftë në kuptimin tradicional.

“Shumë njerëz nuk e quajnë luftë. Unë them se është një konflikt ushtarak, sepse për ne është një lojë. Nuk është ndonjë gjë e madhe. E bëmë në Venezuelë dhe e bëmë këtë”, deklaroi Trump.

Presidenti amerikan tha se SHBA-ja po kryen “sulme sporadike” dhe se aktualisht nuk është duke zhvilluar një luftë në kuptimin klasik.

Trump pretendoi gjithashtu se Shtetet e Bashkuara kanë marrë kontrollin e Ngushticës së Hormuzit dhe se kanë shkatërruar forcat e armatosura iraniane.

“Ajo që kemi arritur është e jashtëzakonshme. Ne kemi marrë kontrollin e Venezuelës dhe, në thelb, kemi edhe kontrollin e Iranit”, tha ai.

Deklaratat e Trump u vunë përballë faktit se 18 ushtarë amerikanë janë vrarë që nga nisja e konfliktit. I pyetur për përdorimin e termit “lojë”, presidenti amerikan reagoi i irrituar dhe e krahasoi situatën me luftërat e zhvilluara nga SHBA-ja në Vietnam dhe Afganistan.

“Nuk mendoj se ka rëndësi se si e quani. Ajo që ka rëndësi është se ne kemi qenë shumë të suksesshëm. Ne e kemi penguar Iranin të pajiset me armë bërthamore”, u shpreh Trump.

Deklaratat vijnë në një moment kur konflikti me Iranin mbetet një prej çështjeve më të ndjeshme për administratën amerikane, ndërsa ndikimi i tij politik dhe ushtarak pritet të jetë një nga temat kryesore përpara zgjedhjeve të mesit të mandatit.