Bllokimi i rrugës kombëtare Librazhd-Përrenjas, reagon shoqëria civile

Përfaqësues të shoqërisë civile në Korçë kanë dalë sot me një deklaratë publike lidhur me situatën e rënduar të krijuar nga dëmtimi i aksit rrugor Pogradec–Librazhd, duke kërkuar reagim të menjëhershëm institucional dhe mbështetje konkrete nga pushteti qendror.

Ata kërkojnë hartimin e një rezolute të përbashkët që do t’i drejtohet qeverisë, me qëllim ndërhyrjen urgjente për zgjidhjen e situatës.

Sipas tyre, bllokimi dhe dëmtimi i këtij aksi ka paralizuar lëvizjen e qytetarëve, ka dëmtuar ekonominë lokale dhe ka krijuar vështirësi serioze për transportin e mallrave dhe shërbimeve.

Njëkohësisht, përfaqësuesit njoftuan se do t’i drejtojnë një letër të hapur qeverisë, ku do të paraqiten kërkesat dhe shqetësimet e qytetarëve.

Nëse nuk do të ketë reagim konkret, më datë 2 do të organizohet një protestë paqësore para bashkisë, si formë presioni qytetar për zgjidhjen e menjëhershme të problemit./Top Channel