Rritja e çmimeve të karburanteve, Japonia do të nisë lirimin e naftës nga rezervat kombëtare

Japonia do të nisë lirimin e naftës nga rezervat e saj këtë javë, ka thënë kryeministrja Sanae Takaichi, ndërsa vendi përgatitet për mungesa të mundshme të shkaktuara nga lufta SHBA-Izrael-Iran.

Qeveria miratoi javën e kaluar lirimin e rezervave private që mbulojnë 15 ditë konsum, mes shqetësimeve se konflikti në Lindjen e Mesme do të vazhdojë të pengojë qarkullimin e anijeve cisternë në Ngushticën e Hormuzit.

Lirimi i rezervave shtetërore do të nisë të enjten, tha Takaichi në një postim në platformën X.

Japonia, një vend me pak burime natyrore por me ekonomi të madhe, importon më shumë se 90% të naftës së saj bruto nga Lindja e Mesme.

Takaichi, e cila javën e kaluar kundërshtoi thirrjet e Donald Trump për të dërguar forca detare japoneze në rajon, tha se paqja dhe stabiliteti në Lindjen e Mesme janë “jashtëzakonisht të rëndësishme për Japoninë dhe komunitetin ndërkombëtar”. Ajo shtoi se Tokio do të vazhdojë të bëjë “të gjitha përpjekjet e nevojshme diplomatike në koordinim të ngushtë me vendet përkatëse”.

Në total, rreth 80 milionë fuçi nafte nga rezervat, ekuivalente me 45 ditë konsum vendas, do të vihen në dispozicion të rafinerive vendase. Kjo është 1.8 herë më shumë se sasia e liruar pas tërmetit dhe cunamit të vitit 2011 që dëmtoi centralin bërthamor Fukushima Daiichi.

Deri në fund të vitit të kaluar, Japonia kishte rreth 470 milionë fuçi rezerva nafte, të barabarta me 254 ditë konsum.

Qeveria ka vendosur gjithashtu subvencione për të kufizuar çmimin e benzinës në rreth 170 jen për litër. Masa erdhi pasi çmimi mesatar i benzinës arriti rekord prej 190.8 jen për litër.

Shqetësimet për mbylljen e mundshme të Ngushticës së Hormuzit kanë shkaktuar frikë te disa konsumatorë japonezë për mungesë të letrës higjienike dhe produkteve të tjera shtëpiake.

Ministria e Tregtisë dhe Industrisë këshilloi qytetarët të mos bëjnë panik, pasi postime në rrjetet sociale krijuan frikë për çmime më të larta dhe mungesa furnizimi.