Trump njofton humbjen e Iranit, duke e quajtur Ngushticën e Hormuzit “Ngushtica e Trumpit”

Presidenti i SHBA-së, Donald Trump, tha sot se bota është më afër se kurrë një Lindjeje të Mesme që është “më në fund e lirë nga terrori iranian dhe shantazhi bërthamor”.

“Për 47 vjet, Irani është njohur si ngacmuesi i Lindjes së Mesme, por ata nuk janë më ngacmues. Ata janë në arrati”, tha Trump, sipas Sky News.

Ai përsëriti pretendimet e tij se ushtria amerikane është më e fuqishmja në botë, si dhe se Irani do të përdorte armë bërthamore nëse do t’i kishte zhvilluar ato dhe se ushtria iraniane është “shkatërruar”.

Ai tha se Uashingtoni dhe Teherani po negociojnë aktualisht dhe “do të ishte shumë mirë nëse do të mund të bënim diçka”.

Ai i bëri thirrje Iranit të rihapë Ngushticën e Hormuzit.

“Ata duhet ta hapin Ngushticën e Trumpit, dua të them, Ngushticën e Hormuzit. Mediat e rreme do të thonë se e thashë këtë rastësisht, por jo, nuk ka rastësi me mua”, tha Trump.

Presidenti amerikan tha se udhëheqësi suprem i Iranit, Mojtaba Khamenei, “nuk është më suprem” dhe se Irani është “i vetmi vend ku askush nuk dëshiron të jetë udhëheqës”.

Duke iu referuar një “dhurate” që ai pretendon se Irani ia dërgoi SHBA-së, Trump tha se ishin 10 anije cisternash si pjesë e negociatave për t’i dhënë fund luftës, duke sugjeruar se ishte një formë kërkimfaljeje.

“Del se kisha të drejtë. Ata po negociojnë, gjë që e pranuan dy ditë më vonë. Dhe për të kompensuar deklaratën e tyre të gabuar, ata thanë se do të dërgonin tetë anije të tjera me naftë, edhe pse duhej të dërgonin vetëm dy”, tha Trump.

Duke folur për NATO-n, ai tha se ishte i zhgënjyer nga vendimi i Aleancës për të mos ndihmuar në luftën kundër Iranit.

“Gjithmonë kam thënë se NATO është një tigër letre. Nëse do të kishte ndonjëherë një luftë të madhe, ju garantoj se ata nuk do të ishin atje”, tha Trump, duke aluduar në një Luftë të Tretë Botërore të mundshme.

Ai i quajti miq presidentin francez Emmanuel Macron dhe kancelarin gjerman Friedrich Merz, por shprehu gjithashtu pakënaqësinë e tij që ata u distancuan nga lufta kundër Iranit.

“Ukraina nuk ishte as lufta jonë, por ne i ndihmuam ata”, tha ai.