'Vendimi i gjykatës, qesharak'/ Trump rrit tarifën doganore për mallrat që vijnë në SHBA: Do të bëhet 15%

Presidenti i SHBA-së, Donald Trump ka thënë se do të vendosë tarifa doganore globale prej 15% për importet.

Trump tha të premten se do t’i zëvendësonte tarifat doganore, të cilat u rrëzuan nga Gjykata Supreme, me një taksë prej 10% për të gjitha mallrat që hyjnë në SHBA.

Por të shtunën, ai njoftoi në Truth Social se kjo do të rritej në maksimumin e lejuar sipas një ligji tregtar, shkruan BBC.

Tarifat doganore prej 15% do të hyjnë në fuqi të martën, më 24 shkurt dhe mund të qëndrojnë në fuqi vetëm për rreth pesë muaj përpara se administrata të kërkojë miratimin e Kongresit.Trump tha se administrata e tij kishte arritur në këtë vendim, pasi e ka konsideruar qesharak vendimin e Gjykatës Supreme.

Gjykata supreme e SHBA, vendosi të premten të rrëzojë tarifat gjithëpërfshirëse të presidentit Donald Trump, të cilat ai i kishte ndërmarrë në bazë të një ligji të destinuar për përdorim në raste emergjencash kombëtare, duke hedhur poshtë një nga pretendimet e tij më të debatueshme mbi autoritetin presidencial, në një vendim me pasoja të mëdha për ekonominë globale.

Gjyqtarët, me një vendim 6-3 të hartuar nga kryetari konservator i Gjykatës, John Roberts, lanë në fuqi vendimin e një gjykate më të ulët se përdorimi nga presidenti republikan i këtij ligji të vitit 1977 kishte tejkaluar kompetencat e tij.

Trump i ka përdorur tarifat doganore mbi mallrat e importuara si një mjet kyç të politikës ekonomike dhe të jashtme. Ato kanë qenë qendrore në një luftë tregtare globale që ai nisi pas fillimit të mandatit të tij të dytë si president, duke larguar partnerët tregtarë, ndikuar tregjet financiare dhe shkaktuar pasiguri ekonomike globale.

Tarifat e Trump parashikohej të gjeneronin triliona dollarë të ardhura për Shtetet e Bashkuara gjatë dekadës së ardhshme, vendi me ekonominë më të madhe në botë./BBC