Britania, Gjermania e Greqia refuzojnë thirrjen e Trump: NATO nuk do të luftojë me Iranin!

Mbretëria e Bashkuar nuk do të përfshihet në një luftë më të gjerë ne lindjen e Mesme, deklaroi  kryeministri Keir Starmer pasi presidenti amerikan Donald Trump paralajmëroi se e ardhmja e NATO-s mund të jetë në rrezik nëse aleatët, përfshirë Mbretërinë e Bashkuar, nuk ofrojnë mbështetje ushtarake në rajon.

Starmer tha se përparësia e Mbretërisë së Bashkuar mbetet mbrojtja e qytetarëve të saj në rajon, ndërkohë që ndërmerr hapat e nevojshëm për të mbrojtur veten dhe aleatët e saj.

Ai shtoi se Britania nuk do të lejojë veten të përfshihet në një konflikt më të gjerë dhe do të vazhdojë të punojë drejt një zgjidhjeje të shpejtë që synon rivendosjen e sigurisë dhe stabilitetit në rajon.

Nderkohe, me heret edhe Gjermania refuzoi perfshirjen ne lufte.

Beteja në Iran nuk ka të bëjë fare me NATO-n, tha një zëdhënës i qeverisë gjermane, duke shtuar se Gjermania nuk do të merrte pjesë në luftë dhe as në mbajtjen e hapur të Ngushticës së Hormuzit me mjete ushtarake.

“Për sa kohë që kjo luftë vazhdon, nuk do të ketë pjesëmarrje, madje as në asnjë përpjekje për ta mbajtur të hapur Ngushticën e Hormuzit me mjete ushtarake”, tha zëdhënësi.

Ministri i Jashtëm Johann Wadephul tha me heret se Gjermania nuk sheh ndonjë rol për aleancën mbrojtëse të NATO-s në adresimin e bllokadës së Ngushticës së Hormuzit nga Irani.

“Nuk shoh që NATO të ketë marrë ndonjë vendim në këtë drejtim ose të mund të marrë përgjegjësinë për Ngushticën e Hormuzit.

Nëse do të ishte kështu, atëherë organet e NATO-s do ta trajtonin atë në përputhje me rrethanat”, tha Wadephul para një takimi të Këshillit të Punëve të Jashtme të BE-së në Bruksel.

Trump ka shtuar presionin mbi aleatët evropianë për të ndihmuar në mbrojtjen e ngushticës, duke paralajmëruar se NATO përballet me një të ardhme “shumë të keqe” nëse anëtarët e saj nuk i vijnë në ndihmë Uashingtonit.

Greqia gjithashtu nuk do të përfshihet në asnjë operacion ushtarak në Ngushticën e Hormuzit, tha zëdhënësi i qeverisë greke, Pavlos Marinakis./lajmifundit