Forumi ekonomik ‘Davos’/ Ukraina sulm me dronë në Shën Petersburg pak para fjalimit të Putin

Ukraina kreu një sulm të gjerë me dronë gjatë natës dhe në orët e para të mëngjesit në Shën Petersburg, vetëm pak orë para hapjes së forumit më të rëndësishëm ekonomik të Rusisë, i njohur si “Davosi rus”.

Sipas raportimeve, tym i zi u pa mbi qytetin e dytë më të madh të Rusisë, ku presidenti rus Vladimir Putin pritet të mbajë një fjalim të premten në Forumin Ekonomik Ndërkombëtar të Shën Petersburgut. Aktiviteti pritet të mbledhë mijëra pjesëmarrës nga rreth 130 vende, përfshirë edhe një delegacion nga Shtetet e Bashkuara.

Autoritetet ruse deklaruan se sistemet e mbrojtjes ajrore rrëzuan 59 dronë gjatë natës. Sipas tyre, tri zona të ndryshme të Shën Petersburgut u goditën, por nuk u raportuan viktima.

Presidenti ukrainas Volodymyr Zelensky reagoi në rrjetet sociale, duke përshëndetur operacionin.

Ndërkohë, zëdhënësi i Kremlinit, Dmitry Peskov, paralajmëroi se Moska do t’i përgjigjet sulmeve. “Përgjigjja jonë do të jetë sistematike”, deklaroi ai.

Sulmi vjen në një moment të rëndësishëm për Rusinë, ndërsa vendi përpiqet të tërheqë investime të huaja dhe të forcojë lidhjet ekonomike me partnerët ndërkombëtarë përmes forumit të përvitshëm ekonomik.