Punonjësja e OSBE-së para gjykatës në Prishtinë nën dyshimet për spiunazh për inteligjencën serbe

Jelena Gjukanoviç, punonjëse e OSBE-së, u paraqit sot para gjykatës së Prishtinës nën dyshimet për spiunazh, në bashkëpunim me një tjetër person, për llogari të inteligjencës serbe.

Sipas prokurorisë, Gjukanoviç kishte qasje në informacione të ndjeshme dhe zhvillonte takime me përfaqësues vendorë dhe ndërkombëtarë, veçanërisht në veri të Kosovës.

Ajo dyshohet se ka dërguar të dhëna të klasifikuara në Beograd.

Në dosje janë gjetur komunikime që prokuroria i konsideron mesazhe të koduara, përfshirë një “falënderim për punën në Kosovë”, të cilat interpretohen si prova të lidhjes së saj me veprimtarinë e inteligjencës serbe.

Mbrojtja ka kundërshtuar këto pretendime, ndërsa prokuroria i përdor mesazhet dhe dokumentet si prova kryesore.

Grupi hetimor dhe gjykata vazhdojnë punën për të sqaruar të gjitha rrethanat e rastit dhe për të përcaktuar përgjegjësitë ligjore. Rasti po ndiqet me interes të lartë nga institucione të ndryshme ndërkombëtare dhe mediat.