Irani kthehet në çështje politike në Botëror, paraqet ankesë zyrtare në FIFA: Kufizimet që na kanë vendosur po na ndikojnë te përgatitjet

Debutimi i Iranit në Kupën e Botës 2026 është shoqëruar me polemika diplomatike, tensione politike dhe probleme logjistike që kanë ngjallur debat të gjerë.

Pas barazimit 2-2 në ndeshjen e parë ndaj Zelandës së Re, Federata Iraniane e Futbollit ka njoftuar se do të paraqesë një ankesë zyrtare në FIFA, duke pretenduar se kufizimet e vendosura ndaj ekipit kanë ndikuar në përgatitjen dhe qetësinë e lojtarëve përpara ndeshjes së radhës kundër Belgjikës në Los Angeles.

Sipas pretendimeve të federatës, delegacioni iranian është lejuar të hyjë në Shtetet e Bashkuara vetëm për ndeshjet, pa të drejtë qëndrimi gjatë natës, duke u detyruar të vendoset në Tijuana të Meksikës. Kjo situatë, sipas tyre, ka krijuar vështirësi të mëdha në lëvizje dhe rikuperim.

Udhëtimet e gjata dhe kontrollet e imigracionit thuhet se kanë shkaktuar lodhje të konsiderueshme te skuadra, e cila është detyruar të udhëtojë menjëherë pas ndeshjeve drejt Meksikës. Federata iraniane pretendon gjithashtu se është refuzuar kërkesa për qëndrim të shkurtër në Los Angeles pas ndeshjeve.

Situata është komplikuar edhe më herët nga refuzimi i vizave për disa anëtarë të stafit teknik, duke rritur më tej tensionet brenda delegacionit.

Para ndeshjes kundër Belgjikës, Irani pretendon se do të lejohet të mbërrijë në Los Angeles vetëm një ditë përpara ndeshjes, në kundërshtim me praktikat standarde të turneut.

Jashtë stadiumit në Los Angeles janë raportuar protesta nga grupe të ndryshme, ndërsa brenda tij atmosfera është shoqëruar me tensione dhe reagime të forta nga tifozët. Në këtë qytet jeton një nga komunitetet më të mëdha iraniane jashtë vendit, gjë që ka shtuar edhe më shumë ngarkesën emocionale dhe politike rreth ndeshjeve.

Trajneri i Iranit dhe kapiteni i ekipit kanë kritikuar situatën, duke thënë se skuadra po përballet me kushte të vështira udhëtimi dhe rikuperimi, ndërsa theksojnë se mbështetja e tifozëve ka qenë një element pozitiv në këto sfida.