FOTOLAJM/ Aksident në aksin Prrenjas–Librazhd, 4 të plagosur të një familjeje nga përplasja e automjeteve

Një aksident i rëndë automobilistik ka ndodhur pasditen e kësaj të enjteje në aksin e rrugës kombëtare Prrenjas–Librazhd, në afërsi të fshatit Qukës.

Burime nga vendngjarja bëjnë me dije se nga përplasja e mjeteve dyshohet për 4 persona të plagosur, ku njëri është në gjendje të rëndë.

Mësohet se janë anëtarë të së njëjtës familje. Menjëherë pas njoftimit, drejt vendit të ngjarjes janë nisur autoambulancat e spitaleve të Librazhdit dhe Prrenjasit për të ofruar ndihmën e parë mjekësore dhe për të transportuar të lënduarit drejt qendrave spitalore.

Aktualisht nuk dihen ende rrethanat dhe shkaqet që çuan në aksidentin e rëndë, ndërkohë që grupi hetimor dhe forcat e policisë janë nisur për në vendngjarje për të kryer veprimet e nevojshme hetimore dhe për të sqaruar dinamiken e aksidentit.