Pas daljes në gjyq, Ilir Meta flet nga paraburgimi: Edhe të dënuarve përjetë u jepet mundësia të flasin, unë ende s’kam ....

Ish-presidenti Ilir Meta ka folur përmes një telefonate nga paraburgimi për emisionin “Breaking” në Top News, duke reaguar ndaj situatës së tij ligjore dhe trajtimit në institucionin e vuajtjes së masës së sigurisë.

Meta u shpreh se po shkelet e drejta për transparencë në proces, duke theksuar se ende nuk i është vënë në dispozicion vendimi i zbardhur i gjykatës.

“Edhe të dënuarve me burgim të përjetshëm u jepet mundësia të flasin. Unë ende nuk kam vendimin e zbardhur,” deklaroi Meta, duke e cilësuar situatën si përmbysje të praktikave demokratike.

Ai shtoi se sipas tij, Konventa Evropiane e të Drejtave të Njeriut duhet të ketë përparësi mbi Kushtetutën dhe se i janë refuzuar disa të drejta procedurale.

Meta përmendi gjithashtu edhe pretendime për kufizime në komunikim dhe trajtim në paraburgim, duke iu referuar raportimeve të institucioneve dhe organizatave monitoruese.

Autoritetet përkatëse nuk kanë dhënë ende një reagim publik ndaj këtyre deklaratave.