Momenti i artë për Kim Jong Un, si i fitoi Koreja e Veriut 14 miliardë dollarë nga lufta e Putinit

Kim Jong-un po kalon një moment të artë. Dy vite në krah të Rusisë në luftën në Ukrainë i kanë sjellë Koresë së Veriut rreth 14.4 miliardë dollarë, një shifër e madhe për një vend me ekonomi të vogël.

Llogaritë janë bërë nga një institut në Seul, që ka analizuar të dhëna inteligjence mbi armët dhe njerëzit që Pheniani i ka dërguar Moskës. Dhe pjesa më e madhe e këtyre parave vjen nga municionet.

Miliona predha, miliarda dollarë

Bëhet fjalë për artileri, municione dhe raketa, me një vlerë të vlerësuar mes 7 dhe 13 miliardë dollarëve. Vetëm nga porti Rason, anije ruse kanë bërë 112 udhëtime në dy vite, duke transportuar rreth 30 mijë kontejnerë.

Brenda tyre: nga 8 deri në 11 milionë predha dhe raketa. Sipas burimeve të tjera, kjo shifër mund të shkojë deri në 15 milionë.

Në kulmin e luftimeve në Kursk, në pranverën e 2025-s, një në dy predha të përdorura nga Rusia ishte prodhim koreanoverior. Në terren janë gjetur edhe mbetje të rreth 100 raketave balistike.

Pagesa jo vetëm me para

Jo e gjithë marrëveshja është bërë me para. Një pjesë është paguar me mallra: Rusia ka dërguar naftë, ushqime dhe teknologji raketore me vlerë deri në 1.5 miliardë dollarë.

Për Phenianin kjo është një marrëveshje shumë e vlefshme, sepse zyrtarisht është nën sanksione ndërkombëtare. Por në praktikë, këto kufizime po anashkalohen gjithnjë e më shumë nga Rusia dhe Kina.

Madje, sipas një hetimi ndërkombëtar, Koreja e Veriut ka marrë edhe sistemin kundërajror Pantsir.

Ushtarët në front dhe kostoja e lartë

Fitimet nuk vijnë vetëm nga armët. Pheniani ka dërguar edhe ushtarë në luftë. Rreth 21 mijë trupa janë përfshirë në luftime në rajonin e Kurskut nga fundi i 2024-s deri në fund të 2025-s.

Por kostoja është e rëndë. Rreth 6 mijë janë goditur dhe deri në 2 mijë dyshohet se kanë humbur jetën.

Pagat për këta ushtarë kanë arritur në rreth 620 milionë dollarë. Një ushtar i thjeshtë merrte rreth 2.800 dollarë në muaj, ndërsa oficerët deri në 5 mijë. Familjet e të vrarëve merrnin nga 6 deri në 10 mijë dollarë.

Megjithatë, një pjesë e mirë e këtyre parave besohet se përfundon te shteti, një praktikë e njohur për regjimin koreanoverior.

Propaganda dhe kontrolli i brendshëm

Numri i saktë i viktimave mbetet i paqartë. Kim është shfaqur në publik duke nderuar të rënët dhe duke takuar të plagosurit. Mediat shtetërore kanë publikuar lista me emra dhe në Phenian po ndërtohen varreza dhe një muze për ushtarët e kthyer nga lufta.

Fotot tregojnë rreshta varresh dhe pllaka me emra. Analistët kanë numëruar qindra emra, por ka vend për mijëra, çka përputhet me vlerësimet për humbjet reale.

Fitimi politik dhe familjar

Përtej parave, ky është edhe një moment politik për Kim Jong-un. Ai është shfaqur në Pekin përkrah Vladimir Putin dhe Xi Jinping, duke rritur peshën e tij ndërkombëtare.

Në këtë dalje, ai prezantoi edhe vajzën e tij Ju Ae, e cila po shfaqet gjithnjë e më shpesh në publik. Në Seul besohet se ajo po përgatitet si pasardhëse.

Në mars, ajo është parë edhe në demonstrime ushtarake, nga lëshimi i raketave deri te testimi i armëve të reja. Është një sinjal i qartë se Kim po e përfshin në rolin e liderit të ardhshëm.

Sytë nga një takim me Trump

Në sfond është edhe një zhvillim tjetër: mundësia e një takimi me presidentin Donald Trump në fund të prillit.

Presidenti amerikan pritet të shkojë në Pekin dhe mund të bëjë një ndalesë të papritur për t’u takuar me liderin koreanoverior. Sinjalet janë se SHBA mund të pranojë realitetin që Koreja e Veriut nuk do të heqë dorë nga armët bërthamore dhe të rikthejë negociatat.

Në këtë mënyrë, Kim Jong-un nuk po fiton vetëm para nga lufta, por edhe më shumë hapësirë dhe rol në skenën ndërkombëtare./CorrieredellaSera