Itali/ Umberto Bossi, themeluesi i Lega Nord, ka ndërruar jetë në moshën 84-vjeçare

ITALI - Ka ndërruar jetë në moshën 84-vjeçare themeluesi i Lega-s, Umberto Bossi. Ministër, senator, deputet dhe eurodeputet i Republikës, themelues i Lega Nord, i së cilës ishte sekretar federal deri në vitin 2012 dhe më pas president i përjetshëm; ka qenë gjithashtu ministër i Reformave për federalizmin. U zgjodh për herë të parë në Senat në vitin 1987. Hyri për herë të parë në qeveri në vitin 2001, kur u emërua ministër për reformat institucionale dhe devolucionin në qeverinë Berlusconi II.

Lidhja e Umberto Bossit me Shqipërinë është se djali i tij, Renzo Bossi, para shumë vitesh rezultonte i diplomuar tek Universiteti ‘Kristal’, pavarësisht se nuk kishte ardhur ndonjëherë në vendin tonë.

Ekzistojnë disa dëshmi për angazhimin e Bossit në të majtën politike në vitet e rinisë. Takimi me idetë autonomiste dhe federaliste ndodhi rastësisht në vitin 1979, në moshën 38-vjeçare, kur në Universitetin e Pavisë vuri re një njoftim të Union Valdôtaine, parti autonomiste e Valle d’Aosta, ku njohu liderin Bruno Salvadori, duke vendosur menjëherë t’i bashkohej kauzës së tij dhe duke u angazhuar për krijimin e një rrjeti lëvizjesh autonomiste në Italinë veriore. Në të njëjtin vit njohu Roberto Maroni, me të cilin nisi një bashkëpunim të gjatë politik.

Bossi mori pjesë, i dërguar nga Salvadori, në mbledhjet e Unione Ossolana per l’Autonomia, parti autonomiste e Val d’Ossola. I frymëzuar nga veprimtaria e këtij lëvizjeje, në vitin 1980 Bossi krijoi siglën e tij të parë politike: Unione Nord Occidentale Lombarda per l’Autonomia. Në vitin 1982 Bossi krijoi një gazetë të re: Lombardia Autonomista. Numri i parë doli në mars 1982 si suplement i Rinascita Piemontese të Roberto Gremmo.

Në zgjedhjet politike të vitit 1983 u paraqit në disa zona të Lombardisë, së bashku me autonomistë të tjerë, nën simbolin e Lista per Trieste, pa u zgjedhur (në zonën Como-Sondrio-Varese mori 157 preferenca: “E dija që po e bëja vetëm për të mbajtur valixhen dhe për të fituar përvojë”; u paraqit edhe në zonën Mantova-Cremona me 3 preferenca dhe në zonën Milano-Pavia me 6).

Më 12 prill 1984 Bossi themeloi Lega Autonomista Lombarda, e cila më pas do të bëhej Lega Lombarda; u zgjodh sekretar kombëtar dhe qëndroi në këtë post deri në vitin 1993, përpara se të krijonte projektin e Lega Nord dhe t’ia linte drejtimin e Lega Lombarda sekretarit të ri Luigi Negri. Aktin e themelimit e firmosën, përpara një noteri në Varese, Umberto Bossi, partnerja e tij Manuela Marrone, Pierangelo Brivio, Giuseppe Leoni, Marino Moroni dhe Emilio Sogliaghi. Marrone vuri në dispozicion shtëpinë e saj për mbledhjet e lëvizjes.

Formacioni i sapokrijuar mori pjesë në zgjedhjet europiane të vitit 1984, në aleancë me lëvizje të tjera rajonale dhe autonomiste, si Liga Veneta, Partito del Popolo Trentino Tirolese dhe Moviment d’Arnàssita Piemontèisa, nën emrin e listës Liga Veneta – Unione per l’Europa Federalista. Bossi mori 1621 preferenca.

Reagimet:

“E përshëndes me dashuri dhe nostalgji Umberto Bossin, një luftëtar i palodhur, një njeri i ashpër dhe i pakëndshëm, por edhe thellësisht i mirë. Ka shënuar historinë e politikës italiane: meriton respekt jo vetëm nga miqtë, por edhe nga kundërshtarët e tij”, deklaroi Pier Ferdinando Casini.

“Me gjithë Forza Italia vajtoj humbjen e Umberto Bossit, lider historik dhe themelues i Lega-s”, shkruan në X zëvendëskryeministri dhe ministri i Jashtëm Antonio Tajani. “Mik i madh i Silvio Berlusconit, politikan me inteligjencë të madhe, ishte një protagonist i rëndësishëm i ndryshimit në Itali. Familjes së tij një përqafim i madh dhe një lutje që të prehet në paqe”.

“Shpreh ngushëllimet e mia të thella për ndarjen nga jeta të Umberto Bossit, themelues i Lega-s dhe protagonist i rëndësishëm i historisë politike italiane të dekadave të fundit. Bossi ka përfaqësuar, me vendosmëri dhe vizion, kërkesat e komuniteteve të gjera të Italisë së Veriut, duke kontribuar në shënimin e një periudhe të rëndësishme politike për vendin tonë. Përtej dallimeve politike, duhet njohur angazhimi dhe roli i tij në forcimin e debatit demokratik dhe institucional. Në këtë moment dhimbjeje, i drejtoj një mendim të sinqertë familjes dhe të gjithë atyre që i kanë qëndruar pranë”, u shpreh Letizia Moratti, presidente e Consulta-s së Forza Italia dhe eurodeputete e Partisë Popullore Europiane./Shqiptarja