Studimi: Drita gjatë gjumit mund të lidhet me ndryshime në zemër

Fjetja në një ambient me shumë dritë gjatë natës mund të lidhet me ndryshime në strukturën dhe funksionin e zemrës, sipas një studimi të publikuar në “European Heart Journal”.

Hulumtimi analizoi të dhënat e më shumë se 11 mijë të rriturve në Mbretërinë e Bashkuar, të cilët mbajtën për një javë një sensor në krah për të matur ekspozimin ndaj dritës gjatë periudhës së gjumit. Rreth tre vite më vonë, pjesëmarrësit iu nënshtruan ekzaminimeve MRI të zemrës.

Studiuesit krahasuan nivelin e ekspozimit ndaj dritës gjatë natës me strukturën dhe funksionin e zemrës. Rezultatet treguan se personat që ekspozoheshin ndaj më shumë drite gjatë gjumit kishin më shpesh shenja të ndryshimeve në zemër.

Një prej gjetjeve ishte trashja e murit të barkushes së majtë, një nga dhomat kryesore të zemrës. Studiuesit vunë re gjithashtu shenja të hershme të ndryshimeve në funksionin e muskulit të zemrës, si dhe ndryshime në dhomat e tjera kardiake.

Sipas autorëve, gjetjet shtojnë prova nga studimet vëzhguese që e kanë lidhur ekspozimin ndaj dritës gjatë natës me shëndetin kardiovaskular.

Një shpjegim i mundshëm është ndikimi i dritës në ritmin cirkadian, pra në orën biologjike të trupit.

Megjithatë, studimi nuk provon se drita gjatë gjumit shkakton drejtpërdrejt dëmtim të zemrës. Bëhet fjalë për një studim vëzhgues, ndaj nevojiten kërkime të mëtejshme për të kuptuar nëse dhe si ekspozimi ndaj dritës gjatë natës ndikon në mënyrë të drejtpërdrejtë në shëndetin kardiovaskular.

Studiuesit sugjerojnë se reduktimi i dritës gjatë orëve të gjumit mund të jetë një masë e thjeshtë për të krijuar kushte më të përshtatshme për pushim, ndërsa rëndësia e gjumit të mirë për shëndetin e përgjithshëm është e dokumentuar gjerësisht.