Zbulohet një specie e rrallë milingonash në Japoni, ku të gjithë anëtarët janë… mbretëresha

Një specie jashtëzakonisht e rrallë milingonash, endemike në Japoni, është e vetmja që nuk ka as punëtorë as meshkuj, por përbëhet ekskluzivisht nga mbretëresha.

Kolonitë e milingonave zakonisht përbëhen nga femra riprodhuese, të njohura si mbretëresha, femra jo-riprodhuese, të quajtura punëtorë, dhe meshkuj që vdesin menjëherë pas çiftëzimit. Janë vërejtur disa devijime nga ky model, siç janë kolonitë e përbëra nga milingona parazitare pa punëtorë, si dhe kolonitë pa meshkuj.

Për gati katër dekada, studiuesit dyshonin se milingona e rrallë parazitare Temnothorax kinomurai prodhonte vetëm mbretëresha, por deri më tani, ata nuk kishin prova. Një studim i ri konfirmon për herë të parë se specia është me të vërtetë e përbërë tërësisht nga mbretëresha, pa meshkuj ose punëtorë, raporton Independent.

Sjellja parazitare

T. kinomurai kishte tërhequr më parë vëmendjen e shkencëtarëve për sjelljen e saj parazitare. Kjo specie pushton kolonitë e një specieje të ngjashme, Temnothorax makora, dhe i mashtron punëtorët e saj që të vrasin mbretëreshën e tyre. Kjo sjellje konsiderohet jashtëzakonisht e rrallë në natyrë, pasi punëtorët e kalojnë tërë jetën e tyre duke u kujdesur për mbretëreshën, duke kërkuar ushqim, duke mbrojtur folenë dhe duke rritur milingonat e reja.

Studimi i ri tregon se, përveç vrasjes së mbretëreshës pritëse, T. kinomurai riprodhohet në mënyrë aseksuale: domethënë, prodhon klone të vetes dhe i mashtron punëtoret pritëse që t’i rrisin ato. Shkencëtarët mblodhën gjashtë koloni me mbretëresha të specieve dhe i monitoruan ato në laborator. Në laborator, ata arritën të rrisnin 43 mbretëresha të reja pa zbuluar asnjë mashkull.

Klonet me anë të partenogjenezës

Duke vëzhguar rregullisht mbretëreshat, ata zbuluan se vezët u zhvilluan në mbretëresha të reja pa u fekonduar nga meshkujt. Ekzaminimi mikroskopik tregoi se organet riprodhuese të përdorura për çiftëzim mbetën joaktive, duke konfirmuar se pasardhësit ishin klone gjenetikisht identike.

Pas vëzhgimit të disa kolonive dhe popullatave, studiuesit arritën në përfundimin se speciet janë plotësisht të lira nga punëtoret dhe meshkujt. Siç theksojnë ata në studimin e botuar në revistën Current Biology, cikli jetësor i T. kinomurai karakterizohet nga një kombinim unik i parazitizmit pa punëtor dhe partenogjenezës, aftësia për të prodhuar pasardhëse femra nga vezët e pafekonduara.

Në hulumtimet e ardhshme, shkencëtarët shpresojnë të kuptojnë kushtet që favorizojnë evolucionin e një modeli kaq të pazakontë, në të cilin një specie milingonash mbijeton dhe riprodhohet pa punëtorë dhe meshkuj, anëtarë që konsiderohen thelbësorë për funksionimin e një kolonie./Lajmi i fundit