Cuneo/ Speleologu bllokohet brenda një shpelle në 120 metra thellësi! Nis operacioni i shpëtimit

Shërbimi Alpin dhe Speleologjik i Piemontes është angazhuar në një operacion shpëtimi speleologjik në Garessio, Cuneo. Këtë të diel u dha alarmi për një speleolog të bllokuar në thellësinë 120 metra në Grotta dei Cinghiali Volanti.

Zona njihet nga entuziastët e speleologjisë për praninë e shpellave dhe rrugëve nëntokësore. Operacioni po zhvillohet në një nga zgavrat e zonës karstike Roça d’Orse–Val d’Inferno, e njohur mirë nga speleologët.

Shpella “Grotta dei Cinghiali Volanti” u zbulua nga SCTanaro në vjeshtën e vitit 2007. Ajo frekuentohet nga ekipe speleologësh për aktivitete kërkimore, dokumentimi dhe eksplorimi.

I bllokuar nën shkëmb

Sipas informacioneve të para, një grup speleologësh kishte mbërritur në fund të shpellës kur njëri prej tyre, një i ri rreth 20 vjeç me banim në Liguria, mbeti i bllokuar nën një shkëmb që me gjasë ishte shkëputur nga një prej mureve të shpellës. I riu ka pësuar lëndime në njërën këmbë dhe për këtë arsye nuk është në gjendje të ngjitet vetë.

Operacioni i shpëtimit

Alarmin e dhanë në orën 17:00 speleologët e tjerë që dolën nga shpella. Ekipi i shpëtimit alpin të Piemontes organizoi menjëherë skuadrën e parë të ndërhyrjes, e cila brenda një ore arriti në fshatin Pianbernardo dhe më pas në vendin e aksidentit, që ndodhet rreth 1,200 metra mbi nivelin e detit.

Një grup shpëtuesish ka zbritur tashmë në shpellë dhe ka arritur te i plagosuri, duke e stabilizuar gjendjen e tij. I riu vijon të jetë në kontakt me të tjerët, por operacioni i nxjerrjes do të jetë i gjatë dhe do të vazhdojë edhe të hënën për shkak të thellësisë dhe kushteve të vështira të mjedisit nëntokësor.

Janë aktivizuar ekipet e shpëtimit nga delegacionet e Piemontes, Ligurias dhe Lombardisë, si dhe komisioni mjekësor dhe specialistët e quajtur “disostruttori” (ekipe që zgjerojnë kalimet e ngushta në shpella). Operacionet e shpëtimit janë veçanërisht komplekse; procedura parashikon tani ndërhyrjen e këtyre specialistëve, të cilët do të zgjerojnë galeritë dhe korridoret e ngushta që zbresin deri në 120 metra thellësi, për të mundësuar nxjerrjen e 20-vjeçarit./Corriere della Sera