Irani ndërpret çdo komunikim me SHBA pas kërcënimit të Trump për Ngushticën e Hormuzit

Irani ka pezulluar të gjitha kanalet diplomatike dhe ndërmjetësimet indirekte me Shtetet e Bashkuara, njoftojnë mediat shtetërore në Teheran.

Sipas tyre, “të gjitha shkëmbimet e mesazheve janë pezulluar” deri në një njoftim të dytë, një veprim që sinjalizon përkeqësimin e marrëdhënieve pas paralajmërimeve të fundit të SHBA-së.

Vendimi iranian vjen në një moment të ndjeshëm pas deklaratës së ish-presidentit Donald Trump, i cili kërcënoi se “një civilizim i tërë do të vdesë sonte” nëse nuk arrihet një marrëveshje që i jep fund konfliktit dhe hap Ngushticën e Hormuzit për trafikun ndërkombëtar.

Ky kanal strategjik i transportit të naftës ka rëndësi të madhe për ekonominë globale, dhe bllokimi i tij ka shkaktuar shqetësime të menjëhershme në tregjet e energjisë.

Analistët paralajmërojnë se ndërprerja e komunikimit mes Teheranit dhe Uashingtonit mund të shkaktojë një përshkallëzim të menjëhershëm ushtarak dhe një krizë energjetike ndërkombëtare, duke rritur pasigurinë për furnizimin me karburante dhe për udhëtimet detare.

Diplomacia ndërkombëtare është vënë në alarm, ndërsa disa vende kanë nisur plane emergjente për të ruajtur rrugët tregtare dhe për të evituar tensionet në rajon.