Përshpejtimi i largimit të emigrantëve të paligjshëm, Mbretëria e Bashkuar dhe vendet europiane me “dorë të hekurt”, çfarë planifikohet

Mbretëria e Bashkuar dhe 46 vende evropiane kanë nënshkruar një deklaratë të përbashkët që synon t’u japë shteteve më shumë fleksibilitet në menaxhimin e migracionit dhe deportimit të migrantëve të paligjshëm, duke kërkuar një qasje më të balancuar nga Gjykata Evropiane e të Drejtave të Njeriut në Strasburg.

Deklarata u prezantua gjatë një samiti në Moldavi dhe thekson se shtetet duhet të kenë më shumë hapësirë për të vepruar në çështjet që lidhen me sigurinë kombëtare dhe interesin publik, sidomos në rastet e kontrabandës së njerëzve dhe presioneve migratore.

Sekretarja e Brendshme britanike, Yvette Cooper, e cilësoi marrëveshjen si një “qasje të bazuar në logjikën e shëndoshë”, duke theksuar se sistemet aktuale nuk duhet të keqpërdoren apo të kufizojnë padrejtësisht vendimmarrjen e shteteve.

Edhe pse dokumenti nuk sjell ndryshime në Konventën Evropiane për të Drejtat e Njeriut, ai shihet si një sinjal politik i rëndësishëm ndaj mënyrës se si Gjykata e Strasburgut duhet të interpretojë çështjet e migracionit në të ardhmen.

Në deklaratë përfshihen gjithashtu propozime për krijimin e “qendrave të kthimit” jashtë territorit evropian për migrantët e refuzuar, një model që tashmë po diskutohet edhe nga disa vende anëtare të BE-së.

Dokumenti rithekson gjithashtu të drejtën e shteteve për të përcaktuar politikat e tyre të emigracionit dhe për të realizuar deportime, duke nënvizuar njëkohësisht se ndalimi i torturës dhe trajtimit çnjerëzor mbetet i pandryshueshëm sipas ligjit ndërkombëtar.