VIDEO/ Aksident tragjik, kamioni me gaz të lëngshëm përmbyset dhe shpërthen në mes të autostradës!

Pamje tronditëse kanë dalë në dritë nga përmbysja dhe shpërthimi i një kamioni që transportonte gaz të lëngshëm në Santiago, Kili.

Siç raporton Reuters, ngjarja ndodhi mëngjesin e së enjtes në kryqëzimin e rrugëve Los Atacameños dhe Avenida Fresia, pranë autostradës Autopista General Velásquez. Si pasojë e shpërthimit humbën jetën të paktën katër persona, ndërsa 17 të tjerë mbetën të plagosur.

Sipas kreut të Policisë, shoferi i kamionit, i cili është mes viktimave, dyshohet se humbi kontrollin e mjetit. Në videot që qarkulluan në rrjetet sociale, pas përmbysjes së kamionit shihet një re e dendur tymi të bardhë që mbulon autostradën dhe automjetet përreth.

Pak sekonda më vonë ndodh shpërthimi, me një shtëllungë të madhe zjarri që u përhap në të gjitha drejtimet.

Shpërthimi u ndje në një rreze prej rreth 150 deri në 200 metrash dhe shkaktoi dëme në të paktën 50 automjete, sipas shërbimit zjarrfikës.

Guvernatori i rajonit metropolitane të Santiagos, Claudio Orrego, deklaroi se pesë persona ndodhen në gjendje të rëndë. Flakët u përhapën edhe në një depo automjetesh të një kompanie ankandesh, duke shkaktuar dëme të mëdha materiale, si dhe në objekte të tjera përreth. Hetimet për shkaqet dhe rrethanat e aksidentit janë në vijim.