Skleroza multiple po prek dhe fëmijë, mjekët shpjegojnë shenjat e para

Skleroza multiple, sëmundja që prek sistemin qendror nervor duke sulmuar membranën mbrojtëse të fijeve nervore në tru, po rritet ndjeshëm, aq sa tanimë po vihet re te fëmijët dhe te 50-vjeçarët.

“Ka një prevalencë 90 për 100 mijë banorë”, tha Altin Kuqo, mjek neurolog.

Skleroza multiple nuk shërohet, por nëse nuk trajtohet në kohë, pacienti invalidizohet brenda 5 viteve. Mjeku neurolog shpjegon shenjat e para.

“Shikim i dyfishtë, mpirje duarsh që zgjat, lodhje, vështirësi për të ngjitur shkallët”, tha ai.

Por cilët janë faktorët që ndikojnë në shfaqjen e sklerozës multiple?

“Gjenetikë dhe ambientalë, stresi dhe inflamacioni i trurit”, pohoi mjeku.

Skleroza multiple prek personat në moshë aktive pune. Më herët ajo shfaqej në fashën e moshës 20–40 vjeç, por tanimë po haset në mosha edhe më të reja. Mjekët apelojnë për diagnostikim të hershëm.