Videoja tregon për herë të parë një dhelpër që gjuan një ujk, dhe jo e kundërta

Shkencëtarët kanë dokumentuar për herë të parë një dhelpër të kuqe duke gjuajtur dhe me shumë gjasa duke vrarë një këlysh ujku brenda strofullës së saj, duke përmbysur atë që dihej më parë për hierarkinë midis dy specieve të lidhura ngushtë.

Dihet që ujqërit ndonjëherë vrasin dhelprat, por e kundërta nuk është dokumentuar kurrë shkencërisht. Regjistrimi u bë në Pasurinë Presidenciale të Castelporziano, një rezervat natyror në periferi të Romës, siç raportohet nga Independent. Studiues nga Universiteti i Sassarit po studionin lëvizjet e ujqërve në zonë dhe kishin instaluar kamera me sensor lëvizjeje pranë një foleje për të monitoruar se si kafshët i rrisnin këlyshët e tyre.

Një natë, një nga kamerat kapi një dhelpër të kuqe duke iu afruar hyrjes së strofullës dhe duke u ushqyer me mbeturina. Pastaj hyri dhe nxori jashtë një këlysh ujku të gjallë. Këlyshi fillimisht arriti të çlirohej dhe të kthehej në strofull, por dhelpra u kthye dhe këtë herë e mori me vete. Studiuesit besojnë se ka shumë të ngjarë që dhelpra ta ketë vrarë dhe ngrënë këlyshin e ujkut, pasi ai nuk shfaqet në asnjë pamje të mëvonshme.

Siç është theksuar në studimin e botuar në revistën Current Zoology, kjo është prova e parë video e një sulmi të përsëritur nga një dhelpër e kuqe ndaj një këlyshi ujku rreth një muajsh, duke përbërë një formë të re të dokumentuar të ndërveprimit të drejtpërdrejtë grabitqar midis dy specieve. Pas incidentit, tufa e ujqërve e braktisi përgjithmonë strofullën, ndoshta sepse zona tani ishte e ekspozuar dhe konsiderohej e pasigurt.

“Strategji oportuniste e të ushqyerit”

Shkencëtarët thonë se sjellja e dhelprës ishte e habitshme, duke pasur parasysh se burime të tjera ushqimore, të tilla si drerët e vegjël, ishin të disponueshme në zonën pyjore. Ata argumentojnë se incidenti është një shembull i “strategjisë jashtëzakonisht oportuniste të të ushqyerit” të dhelprës së kuqe.

“Vëzhgimi ynë zgjeron gamën e njohur të ndërveprimeve konkurruese që ndikojnë në pasardhësit e ujqërve, duke demonstruar se edhe mezokornivorët (gjitarë mishngrënës të vegjël deri në të mesëm) mund të ushtrojnë presion të drejtpërdrejtë mbi performancën riprodhuese të këtij grabitqari kryesor”, shkruan ata.

“Ky vëzhgim i izoluar ofron prova të reja të ndërveprimeve dhelpra-ujk dhe thekson rëndësinë e monitorimit në terren për të identifikuar sjellje të papritura që kërkojnë hetime të mëtejshme.”Lajmi i Fundit