Asllani në situatë të vështirë: Interi kërkon shitjen 18 milionë euro, por askush s'e merr

Kristjan Asllani po kalon një nga periudhat më të paqarta në karrierë. Interi nuk e ka më në planet, sidomos pas afrimit të kroatit Petar Sucic, dhe ka vendosur ta shesë. Por përkundër dëshirës për ta larguar, mungojnë ofertat konkrete që përmbushin kërkesat e klubit.
Interi ka vendosur që Asllani të largohet këtë verë dhe ka vendosur një çmim prej 18-20 milionë eurosh për shitjen e tij. Megjithatë, kjo shumë po rezulton një pengesë e madhe për interesuesit potencialë, duke krijuar një situatë të komplikuar për lojtarin dhe klubin.

Nga ana e tij, Asllani preferon të qëndrojë në Serie A dhe nuk dëshiron të transferohet jashtë Italisë, duke kufizuar kështu opsionet e tij në merkato.

Oferta më konkrete që ka marrë Interi ka qenë nga klubi spanjoll Betis, por ajo është refuzuar nga të dyja palët. Interi nuk ishte i gatshëm të ulte çmimin, ndërsa Asllani nuk e pranoi destinacionin.

Në këtë moment, interesat e vetme serioze vijnë nga skuadrat italiane Bologna dhe Fiorentina, por Interi nuk është i gatshëm ta huazojë lojtarin dhe kërkon vetëm shitjen e plotë, duke bllokuar çdo mundësi tjetër dhe duke krijuar një ngërç në merkato.

Kjo “pikë e vdekur” në negociata po e vendos Asllanin në një situatë të vështirë, ku e ardhmja e tij sportive mbetet e paqartë dhe e lidhur ngushtë me kërkesat financiare të Interit dhe dëshirat e tij personale.

Në pritje të zhvillimeve të reja, lojtari dhe menaxherët e tij po analizojnë mundësitë për të gjetur një zgjidhje që do t’i sigurojë atij më shumë minuta në fushë dhe stabilitet në karrierë.