Të huajt do të blejnë tokë bujqësore shqiptare. Ja kush është risku

Një nisëm e hedhur për konsultim publik parashikon që të huajt do të kenë mundësi të blejnë tokë bujqësore shqiptare.

Në kuadër edhe të plotësimit të kushteve për anëtarësim, nisma vjen si detyrim ligjor.

Drafti parashikon që janë afro 120 mijë ha tokë të pandarë, ndërsa kur të hyjë ligji në fuqi, të huajt do të mund të blejnë 2 ha deri në 30 ha tokë bujqësore në të gjithë vendin, me kushtin që do të kryejnë investime bujqësore.

Adrian Doko, pedagog në universitetin Bujqësore ngre disa pikëpyetje mbi këtë nismë.

“Aktualisht, sikur është prezantuar, nisma ka disa mangësi. Ligji europian i jep të drejtën e parë shtetasit të vet, pra të drejtën e parablerjes duhet ta ketë fermeri shqiptar dhe më pas i huaji. Kjo gjë nuk është e saktësuar. Eksperienca ka treguar se ligjet hartohen dhe miratohen dhe më pas ndryshohen rrugës. Kush na garanton që nga tokë bujqësore ajo të tjetërsohet në tokë truall? Mbi të gjitha nisma ka dhe një të metë. Krijon pabarazi, pasi një shtetas europian ka më shumë mundësi financiare se një shqiptar, ndaj çmimi i tokës do të rritet me njëherë”, tha Doko në Vizion Plus.

Nisma është një detyrim ligjor europian, por ajo nuk e zgjidh problemin më të madh që ka bujqësia shqiptare, fragmentarizimin e tokës.

“A e zgjidh ky ligj faktin që toka bujqësore është e fragmentarizuar? Sot problemi më i madh është se fermat kanë sipërfaqe të  vogla dhe nuk i jep mundësi fermerëve ta punojnë dhe të dalin me leverdi ekonomike. Ka vende që e ofrojnë me detyrim që kush ble tokë bujqësore duhet dhe të jetojë pranë saj. Këto detaje ende nuk janë pasqyruar. Ky ligj që të sillte risi duhet që ta vendosë kush investitor duhet të ofrojë teknologji dhe bujqësinë “green” dhe jo atë me kimikate”, sqaron profesor Doko.

Ministria e bujqësisë është ende në fazë konsultimi, por zbatimi i saj parashikohet pas anëtarësimit në BE.