Avionë çekë dhe sllovakë evakuojnë 181 persona nga Izraeli

.

Republika Çeke dhe Sllovakia kanë riatdhesuar dhe evakuuar 181 persona nga Izraeli me fluturime speciale qeveritare mes konfliktit të armatosur me Iranin, thanë të dy kryeqytetet të martën.

Një aeroplan qeveritar çek me 66 persona zbarkoi në Pragë të martën në mëngjes. Një ditë më parë, një aeroplan sllovak transportoi 73 persona nga Amani, kryeqyteti i Jordanisë, në Bratislavë.

Izraeli mbylli hapësirën e tij ajrore të premten, ditën kur filloi sulmet e tij të pashembullta ajrore kundër Iranit.

“Jam e lumtur që të gjithë janë mirë. Transporti i tyre ishte vërtet i vështirë në këtë mjedis të ndërlikuar”, tha Ministrja Çeke e Mbrojtjes Jana Černohová për X, duke iu referuar fluturimit çarter të organizuar nga qeveria e saj.

Ajo sqaroi se shumica e 66 personave të evakuuar nga Izraeli kanë shtetësi çeke.

“Nuk ishte e mundur të dërgohej avioni transportues (i Forcave Ajrore Çeke) direkt në Izrael, hapësira ajrore e të cilit është e mbyllur”, sqaroi ministria e saj në një deklaratë, duke shtuar se këta njerëz u evakuuan “nëpërmjet një vendi fqinj”.

Sipas mediave çeke, një konvoj u nis nga Tel Avivi të hënën në mëngjes dhe hipi në aeroplan në Sharm el-Sheikh, Egjipt.

Përveç kësaj, një aeroplan qeveritar sllovak që mbante 73 pasagjerë – kryesisht sllovakë, por edhe qytetarë të vendeve të tjera, si Polonia, Republika Çeke, Austria dhe Sllovenia, ndër të tjera – zbarkoi në Bratislavë pardje në orën 19:00 (me orën tonë), tha Ministri i Jashtëm Juraj Blanar.

Një aeroplan tjetër sllovak evakuoi me nxitim 42 pasagjerë të tjerë dje. Izraeli nisi sulmin e tij të paprecedentë ndaj Iranit të premten, duke thënë se qëllimi ishte të parandalonte Teheranin nga blerja e një arsenali bërthamor – diçka që Republika Islamike e mohon se e kërkon.

Sulmi izraelit ka vrarë të paktën 224 persona dhe ka plagosur më shumë se 1,000, sipas numrit të fundit zyrtar, të njoftuar të dielën. Në shenjë hakmarrjeje, Irani ka nisur një seri sulmesh me raketa që kanë vrarë 24 persona në Izrael që nga e premtja, sipas zyrës së kryeministrit izraelit Benjamin Netanyahu.