Babai i përlotur rrëfen momentin kur gjeti të bijën 19-vjeçare të pajetë në shtëpi, pas sulmit nga qeni i familjes

Babai i një adoleshenteje që humbi jetën pas një sulmi nga qeni ka treguar momentin tronditës kur e gjeti vajzën e tij të pajetë në banesë.

Jack Biscoe, 37 vjeç, rrëfen se gjeti vajzën e tij, Jamie-Lea Biscoe, 19 vjeç, të shtrirë në dysheme në dhomën e tij të gjumit, rreth orës 22:45 të së premtes.

Policia mbërriti menjëherë në vendngjarje në fshatin Leaden Roding, në Essex, por e reja u shpall e vdekur pasi kishte pësuar një plagë kafshimi në qafë.

Qeni i familjes, një lurcher shtatëvjeçar me ngjyrë “blue-merle” i quajtur Shy, është sekuestruar nga policia së bashku me këlyshët e tij pas vdekjes tragjike të 19-vjeçares.

Babai, i shkatërruar nga dhimbja, e përshkroi ngjarjen si “tmerr dhe shkatërrim”, edhe pse e cilësoi qenin si “më i buti” dhe “miku më i mirë” i vajzës së tij.

Ai tregoi se u sulmua nga qeni ndërsa përpiqej t’i shpëtonte jetën vajzës duke i dhënë ndihmën e parë (CPR), duke pësuar plagë në krahë dhe humbje të një pjese të veshit, që do të kërkojë ndërhyrje kirurgjikale rikonstruktive.

“Duke parë tmerrin dhe shkatërrimin që ka shkaktuar, nuk ia vlen. Trajtojini si qen, jepuni vendin e tyre dhe bëni kujdes”, tha ai për median britanike.
“Mendova se mund t’i besoja atij qeni me jetën time, por ai mori jetën e vajzës sime”, shtoi Biscoe.

37-vjeçari paralajmëroi gjithashtu familjet për rrezikun, duke theksuar se “një qen mund të marrë një jetë shumë shpejt” dhe se rreziku nuk lidhet me një racë të caktuar.

Ai u arrestua nën dyshimin se kishte nën kontroll një qen të rrezikshëm jashtë kontrollit që shkaktoi vdekje, por më pas u lirua me kusht, ndërsa hetimet vijojnë.

Sipas tij, ai e gjeti vajzën pa ndjenja mes shtratit dhe komodinës, pasi ishte kthyer në shtëpi me partnerin e tij mbrëmjen e së premtes.

Jamie-Lea përshkruhet nga i ati si “shoqja e tij më e mirë”, ndërsa shtoi se humbja e saj është “jashtëzakonisht e dhimbshme”.

“Nuk di si të vazhdoj jetën pa të. Ishte fëmija im i vetëm”, u shpreh ai.

Një faqe në GoFundMe, e hapur nga tezja e viktimës për të mbledhur fonde për funeralin, ka grumbulluar mijëra paundë. Në përshkrim thuhet se 19-vjeçarja “ishte një nga njerëzit më të mirë dhe më të dashur, gjithmonë e gatshme të ndihmonte të tjerët” dhe se “e donte jetën dhe familjen e saj, veçanërisht të atin”.

Familjarë dhe miq kanë reaguar në rrjetet sociale duke shprehur dhimbjen dhe ngushëllimet për humbjen tragjike.

Ndërkohë, policia e Essex konfirmoi se e reja humbi jetën si pasojë e plagëve që dyshohet se u shkaktuan nga sulmi i qenit. Hetimet vijojnë për të zbardhur plotësisht rrethanat e ngjarjes, ndërsa autoritetet u kanë bërë thirrje qytetarëve të respektojnë privatësinë e familjes në këtë periudhë të vështirë.