Shmanget tragjedia! Nxënësit ndalojnë autobusin e shkollës pasi shoferes i bie të fikët në timon (VIDEO)

Një ngjarje në Misisipi të SHBA-së është kthyer në histori frymëzuese, pasi disa nxënës shpëtuan jetën e shoferes së tyre të autobusit shkollor gjatë një emergjence shëndetësore.

Incidenti ndodhi më 22 prill, kur rreth 40 nxënës po udhëtonin me autobusin e shkollës. Shoferja, Leah Taylor, humbi ndjenjat si pasojë e një ataku astme, ndërsa automjeti vijonte lëvizjen në rrugë.

Sipas pamjeve të publikuara nga Distrikti Shkollor Hancock, një nxënëse në pjesën e përparme reagoi menjëherë duke kapur timonin, ndërsa të tjerë u përpoqën të ndihmonin dhe të qetësonin situatën. Një prej nxënësve arriti të frenonte autobusin në mënyrë të sigurt, duke shmangur një aksident të mundshëm.

Paralelisht, një tjetër nxënëse i dha shoferes ilaçin e saj, ndërsa pjesa tjetër kërkoi ndihmë urgjente.

Autoritetet shkollore vlerësuan reagimin e shpejtë dhe guximin e nxënësve, duke theksuar se veprimet e tyre ishin vendimtare për shmangien e një tragjedie. Pesë nxënës u nderuan më pas për veprimin e tyre heroik.

Shoferja e autobusit ndodhet në gjendje të stabilizuar dhe ka shprehur mirënjohje të thellë ndaj nxënësve, duke thënë se ata i shpëtuan jetën.