Stuhi e fuqishme dimërore godet New York-un, mbi 60 cm borë dhe mijëra fluturime të anuluara

New York City ndodhet në qendër të një prej stuhive më të fuqishme dimërore të viteve të fundit, me autoritetet që paralajmërojnë për reshje bore që mund të kalojnë 60 centimetra dhe për kushte potencialisht të rrezikshme për jetën. National Weather Service ka shpallur paralajmërim për stuhi bore në të gjithë zonën metropolitane, përfshirë pesë bashkitë e qytetit dhe Long Island.

Sipas parashikimeve, reshjet mund të arrijnë deri në 5 centimetra në orë, të shoqëruara me erëra që mund të fryjnë deri në 80 km/h, duke krijuar dukshmëri pothuajse zero. Kushtet e motit pritet të përkeqësohen gjatë natës, kur stuhia të arrijë kulmin e saj.

Transporti ajror është goditur rëndë nga moti i keq. Në aeroportet kryesore të qytetit – John F. Kennedy International Airport, LaGuardia Airport dhe Newark Liberty International Airport – janë anuluar mbi 3.000 fluturime, ndërsa dhjetëra mijëra pasagjerë po përballen me vonesa të gjata. Kompanitë ajrore kanë ndërmarrë anulime parandaluese në pritje të përkeqësimit të mëtejshëm të situatës.

Kryetari i bashkisë, Zohran Mamdani, deklaroi se parashikimet u ndryshuan ndjeshëm brenda pak orësh, duke detyruar qytetin të forcojë masat emergjente. Janë vënë në gatishmëri më shumë mjete borëpastruese dhe ekipe ndërhyrjeje, ndërsa autoritetet u bëjnë thirrje qytetarëve të shmangin çdo lëvizje të panevojshme për shkak të rrezikut nga rënia e pemëve, kabllove elektrike dhe ndërprerjeve të energjisë.

Kulmi i stuhisë pritet mes mbrëmjes së së dielës dhe mëngjesit të së hënës me orën lokale, me një përmirësim gradual nga pasditja e së hënës. Megjithatë, pasojat e kësaj stuhie dimërore mund të ndihen për disa ditë, duke e vënë Nju Jorkun përballë një prej sfidave më të vështira të dekadës së fundit.