Kriza politike në Kosovë/ Kurti dhe Abdixhiku dështojnë të arrijnë marrëveshje për presidentin

Partia në pushtet Lëvizja Vetëvendosje dhe opozita Lidhja Demokratike e Kosovës nuk kanë arritur marrëveshje për zgjedhjen e presidentit të ri të Kosovë, pas një takimi të mbajtur të hënën mes drejtuesve të dy partive.

Pas takimit, kryeministri Albin Kurti deklaroi se bisedimet dështuan, pasi sipas tij LDK nuk pranoi ofertat e paraqitura për bashkëqeverisje. Ai tha se i ka dërguar ftesë edhe liderit të Partia Demokratike e Kosovës, Bedri Hamzës, për një takim të mundshëm, duke lënë të hapur mundësinë e një marrëveshjeje të re politike.

Kurti bëri të ditur se kishte ofruar për LDK-në disa poste kyçe në qeveri, përfshirë postin e zëvendëskryeministrit, Ministrinë e Punëve të Jashtme dhe disa ministri të tjera, si dhe në një variant tjetër edhe postin e kryetarit të Kuvendit. Sipas tij, ideja ishte krijimi i një bashkëpunimi të ri politik mes dy partive.

Nga ana tjetër, kryetari i LDK-së Lumir Abdixhiku deklaroi se bisedimet kanë dështuar dhe se nuk do të ketë më takime me Kurtin për këtë çështje. Ai tha se partia e tij nuk pajtohet që një subjekt politik të udhëheqë njëkohësisht tri institucionet kryesore të vendit.

Abdixhiku shtoi se do t’i rikthehet forcimit të partisë dhe bashkimit të opozitës, duke e cilësuar këtë si prioritet politik. Ai gjithashtu la të hapur mundësinë e afrimit me ish-presidenten Vjosa Osmani, duke e konsideruar një zhvillim pozitiv për vendin dhe LDK-në.

Kriza politike vjen në një moment kur afati kushtetues për zgjedhjen e presidentit po afron, dhe nëse nuk arrihet marrëveshje deri më 28 prill, vendi rrezikon të shkojë në zgjedhje të parakohshme. Aktualisht, detyrën e ushtrueses së presidentit po e mban kryetarja e Kuvendit Albulena Haxhiu.

Sipas Kushtetutës së Kosovës, presidenti zgjidhet nga Kuvendi me shumicë të cilësuar, çka e bën të domosdoshme një marrëveshje mes partive parlamentare.