A është vërtet e rrezikshme të ulesh në një tualet publik? Shkenca mund t'ju befasojë

Shumica e mikrobeve në tualetet publike përhapen përmes duarve dhe ajrit, jo nga ulësja e tualetit. Kjo do të thotë se higjiena është shumë më e rëndësishme sesa shmangia e uljes.

Nëse je prind ose ke një gjendje shëndetësore që të detyron të përdorësh shpesh tualetin, me siguri e di tashmë se cilët janë tualetet publike më të përdorshme pranë teje. Por ndonjëherë ndodh që nuk ka alternativë dhe përballesh me një tualet që duket i papastruar. Atëherë lind dilema: a duhet të ulesh apo jo?

Edhe kur një tualet duket relativisht i pastër, pyetja mbetet: a mund të sëmuresh nga mikrobet në ulëse?

Çfarë ka në një tualet publik?

Të rriturit e shëndetshëm nxjerrin çdo ditë më shumë se një litër urinë dhe mbi 100 gram feçe. Gjatë këtij procesi, bakteret dhe viruset çlirohen dhe një pjesë përfundon në ambientin e tualetit. Personat me diarre çlirojnë sasi shumë më të mëdha mikrobesh të dëmshme.

Kështu, tualetet publike, sidomos ato që përdoren shpesh dhe pastrohen rrallë, mund të kthehen në një "supë mikrobesh".

Çfarë mikrobesh gjenden?

Në ulesët e tualeteve janë gjetur:

Baktere nga zorra si E. coli, Klebsiella, Enterococcus, si dhe viruse si norovirusi dhe rotavirusi, që shkaktojnë të vjella dhe diarre
Baktere nga lëkura si Staphylococcus aureus, përfshirë forma rezistente ndaj antibiotikëve
Parazitë dhe organizma mikroskopikë që mund të shkaktojnë dhimbje barku

Ekziston edhe biofilmi, një shtresë mikrobesh që grumbullohet nën buzën e tualetit dhe në sipërfaqe.

A është ulësja pjesa më e ndotur?

Jo. Studimet tregojnë se ulëset shpesh janë më të pastra se dorezat e dyerve, butonat e shpëlarjes dhe rubinetët, sepse këto preken vazhdimisht me duar të palara.

Një problem tjetër është shpëlarja. Kur tualeti shpëlahet pa kapak, krijohet një "re tualeti" me pika shumë të vogla që përhapen në ajër deri në 2 metra. Edhe tharëset e duarve mund të përhapin mikrobe.

Si përhapen mikrobet?

Duke prekur sipërfaqe të ndotura
Duke prekur fytyrën ose ushqimin pa larë duart
Duke i thithur nga ajri
Nga spërkatjet e ujit të tualetit

Si të mbrohesh?

Përdor mbulesa për sediljen ose letër
Mbyll kapakun para shpëlarjes, nëse ka
Laji duart për të paktën 20 sekonda
Mbaj dezinfektues për duart
Shmang tharëset me ajër, përdor letra
Mos përdor telefonin në tualet dhe pastroje shpesh

Pra, a është e sigurt të ulesh?

Për shumicën e njerëzve të shëndetshëm, po. Rreziku është i ulët. Infeksionet zakonisht vijnë nga duart e pista, sipërfaqet dhe ajri, jo nga sedilja.

Në vend që të shqetësohesh për uljen, përqendrohu te higjiena. Dhe mos rri pezull mbi tualet, kjo e vështirëson zbrazjen e fshikëzës dhe mund të krijojë më shumë ndotje. / Scitech Daily