U prangos në Kolumbi/ Florind Rama dyshohet për lidhje me Sinaloan, vrau informatorin serb të policisë gjermane

Në Pereira është arrestuar shtetasi shqiptar Florind Rama, i njohur edhe me identitetin Florin Terziu, i shpallur në kërkim ndërkombëtar nga Interpol për një ngjarje të rëndë kriminale të ndodhur në vitin 2022 në Marbella.

Sipas raportimeve të El Tiempo, kapja e tij erdhi pas një operacioni hetimor që zgjati rreth një muaj. Autoritetet kolumbiane monitoruan lëvizjet e tij në zona të ndryshme të qytetit, ku ai ndryshonte shpesh automjetet dhe rutinën për të shmangur identifikimin. Ky aktivitet i dyshimtë tërhoqi vëmendjen e strukturave të inteligjencës.

Në momentin e ndalimit, ai tentoi të paraqitej si shtetas gjerman, por hetuesit kishin të dhëna të sakta mbi identitetin dhe të kaluarën e tij kriminale në Evropë. Sipas burimeve, përdorte dokumente të ndryshme udhëtimi dhe kishte lëvizur në disa shtete, përfshirë Mbretërinë e Bashkuar, Gjermaninë dhe vende të Ballkanit.

Hetimet e lidhin me rrjete kriminale që veprojnë në zonën e Costa del Sol, një nga pikat më të njohura të aktivitetit të trafikut të drogës në Evropë. Rasti për të cilin kërkohej lidhet me një krim të ndodhur në qershor 2022, ku një shtetas serb u gjet i vrarë në një zonë rezidenciale në Marbella, me shenja torture dhe plagë nga armë zjarri.

Sipas dosjeve hetimore, viktima kishte lidhje me rrjete të trafikut të narkotikëve dhe dyshohet se kishte bashkëpunuar me autoritetet në Gjermani, çka mund ta ketë bërë objektiv. Ndërkohë, emri i Ramës përmendet në lidhje me struktura kriminale me origjinë ballkanike, me shtrirje në disa vende evropiane.

Operacioni për arrestimin e tij u realizua në bashkëpunim mes autoriteteve kolumbiane, Europol dhe agjencive amerikane të sigurisë. Aktualisht, ai pritet të përballet me procedurat e ekstradimit drejt Evropës, ndërsa hetimet vijojnë për të zbardhur plotësisht aktivitetin e tij dhe lidhjet e mundshme me rrjete ndërkombëtare të trafikut të drogës.