Izraeli bombardon ministrinë e Jashtme të Iranit, vret dy gjeneralë dhe kreun e inteligjencës

Agjencia iraniane e lajmeve Tasnim raporton se kreu i organizatës së inteligjencës së IRGC-së dhe dy gjeneralë të tjerë u vranë në sulmet izraelite të dielën.

Sipas agjencisë, Mohammad Kazemi, kreu i Organizatës së Inteligjencës së Korpusit të Gardës Revolucionare Islamike (IRGC), drejtoi njërën nga dy agjencitë kryesore të inteligjencës në vend.

Zëvendësministri i Jashtëm i Iranit, Saeed Khatibzadeh, tha se Izraeli nisi një “sulm të qëllimshëm dhe të pamëshirshëm” në njërën nga ndërtesat e punëve të jashtme.

“Disa civilë u plagosën në sulm, përfshirë një numër kolegësh të mi që u dërguan në spital për trajtim”, tha Khatibzadeh në X.

Pamjet që qarkullojnë në mediat sociale dhe janë verifikuar nga CNN, tregojnë tym që del nga biblioteka e Ministrisë së Punëve të Jashtme, e vendosur në veri të Teheranit.

Një video e dytë e gjeo-lokuar nga CNN tregon tym të dendur pranë Ministrisë së Drejtësisë, në Teheranin perëndimor.

Izraeli godet bazat e raketave dhe radarëve në Iran

Forcat ajrore të Izraelit kanë goditur dhe shkatërruar objektiva ushtarake në Teheran, thanë të dielën Forcat Mbrojtëse të Izraelit (IDF).

“IAF goditi dhe çmontoi vendet e prodhimit të raketave tokë-tokë, vendet e radarëve të zbulimit dhe lançuesit e raketave tokë-ajër në Teheran, me udhëzimin e Drejtorisë së Inteligjencës së IDF-së”, tha IDF në një deklaratë.

Lëvizjet erdhën pasi Izraeli tha se po fillonte një 'seri sulmesh' që synonin raketat tokë-tokë në Iranin perëndimor.

Izraeli nis valë të re sulmesh ndaj Iranit, objektiv bazat e raketave

Ushtria izraelite ka lëshuar një deklaratë ku thuhet se ka filluar një valë sulmesh ajrore që synojnë ato që ajo pretendon se janë baza raketash në Iranin perëndimor.

Me heret, Kryeministri i Izraelit pretendoi se sulmet ndaj centraleve bërthamore të Iranit në Natanz dhe Isfahan e kanë penguar ndjeshëm programin e tij bërthamor.

“Nuk mund ta lejojmë Iranin të zotërojë armë bërthamore, pasi synon t’ua ofrojë ato rebelëve Huthi dhe të tjerëve”, deklaroi Benjamin Netanyahu në një intervistë të drejtpërdrejtë me Fox News.

Kur u pyet për arsyet e sulmeve të Izraelit ndaj objekteve të naftës dhe energjisë të Iranit dhe nëse ato i shërbejnë qëllimit të pengimit të programit bërthamor të vendit, Netanyahu tha se Izraeli ishte “gati të ndërmarrë çdo veprim të nevojshëm dhe sigurisht që ne do të ndërmarrim disa nga këto veprime në përgjigje të asaj që Irani na bën”.

"Por ... objektivat tanë kryesorë janë ushtria dhe objektivat bërthamore dhe ne po i synojmë ato me saktësi dhe qëllim."