Mijëra marinsa tashmë në Gjirin Persik. “SHBA-të janë gati për një sulm tokësor

Shtetet e Bashkuara janë gati për një kthesë në luftën kundër Iranit. Pentagoni po përgatitet për javë operacionesh tokësore, ndërsa mijëra ushtarë dhe marinë amerikanë arrijnë në Lindjen e Mesme për atë që mund të kthehet në një fazë të re, të rrezikshme të konfliktit, nëse presidenti Donald Trump vendos të intensifikojë përshkallëzimin.

Sipas disa burimeve të Washington Post, operacionet tokësore nuk do të jenë një pushtim i gjerë, por më shumë inkursione të kryera nga forcat speciale dhe njësitë e këmbësorisë. “Është detyrë e Pentagonit të bëjë përgatitje për të ofruar të gjitha opsionet komandantit suprem. Kjo nuk do të thotë që ai ka marrë një vendim,” thekson zëdhënësja e Shtëpisë së Bardhë, Karoline Leavitt. Ndërkohë, CNN raporton se anija USS Tripoli ka mbërritur në rajon me 3.500 marinë dhe ushtarë.

Në ditët e fundit, administrata amerikane ka luhatur mes deklaratave për një zvogëlim të mundshëm të luftës dhe kërcënimit për ta intensifikuar atë. Edhe pse Trump ka shprehur dëshirën për të negociuar një përfundim të konfliktit, Leavitt paralajmëroi të martën se, nëse regjimi i Teheranit nuk heq dorë nga ambiciet bërthamore dhe nuk ndalon kërcënimet ndaj SHBA-ve dhe aleatëve, presidenti është “gati të shkaktojë ferrin” ndaj tyre.

Forcat iraniane, nga ana e tyre, kanë deklaruar se “po presin mbërritjen e trupave amerikane në territor për t’i goditur dhe për të ndëshkuar përgjithmonë partnerët e tyre rajonalë,” tha presidenti i Parlamentit të Republikës Islamike, Mohammad Bagher Ghalibaf: “Raketat tona janë në vend. Vendosmëria dhe besimi ynë janë rritur.” Ndërkohë, zëdhënësi i komandës operative iraniane, Ebrahim Zolfaghari, paralajmëron SHBA-në për idenë e dërgimit të trupave për të okupuar ishujt e vendit: “Komandantët dhe ushtarët amerikanë do të bëheshin pre e lehtë për peshkaqenët e Gjirit Persik nëse dërgoheshin,” paralajmëron ai.

Sipas analistëve të cituar nga mediat amerikane, dislokimi i madh i trupave amerikane mund të ketë si qëllim të marrë të drejtëpërdrejta nga Irani ose të përgatitet për sulmin final të Operacionit Epic Fury, që do t’i lejonte Trump të shpallte fitore, por kjo do të mund të ndodhte vetëm nëse Ngushtica e Hormuzit do të hapej sërish. “Presidenti ka opsione të kufizuara për të vendosur përfundimin e luftës. Dhe kjo pjesërisht sepse nuk ka qartësi se cili mund të jetë një rezultat i kënaqshëm,” shpjegon Jonathan Panikoff, ish-zëvendës këshilltar për sigurinë kombëtare për Lindjen e Mesme, duke folur për Reuters.

Dje, mediat shtetërore iraniane raportuan se sulme me raketa nga SHBA dhe Izraeli kanë goditur një qytet portual pranë Ngushticës së Hormuzit, ndërsa forcat ajrore izraelite kanë kryer një tjetër valë sulmesh mbi Teheranin dhe zona të tjera të vendit, duke goditur infrastrukturat e regjimit (më shumë se 140 në 24 orët e fundit, sipas IDF).

Në frontin diplomatik, gjatë bisedimeve të zhvilluara dje në Islamabad mes Pakistanit, Turqisë, Egjiptit dhe Arabisë Saudite, diskutimet fillestare janë përqendruar në propozime për rihapjen e Hormuzit. Ndërmjetësuesit kanë shqyrtuar propozime për trafikun detar, të cilat para takimit Pakistani i kishte dërguar Shtëpisë së Bardhë. Një nga opsionet, e ardhur nga Kajro, parashikon tarifa të ngjashme me ato të Kanalit të Suezit.

Turqia, Egjipti dhe Arabia Saudite mund të formojnë një konsorcium për të menaxhuar kalimin e flukseve të naftës përmes Ngushticës, një propozim që sipas raporteve është diskutuar me SHBA-në dhe Iranin./Lajmi i Fundit