Instagram në SHBA do t'i informojë prindërit rreth tendencave të mundshme vetëvrasëse të fëmijëve të tyre.

Instagram do të njoftojë prindërit që kanë aktivizuar kontrollet prindërore në llogarinë e adoleshentit të tyre nëse e gjejnë atë duke kërkuar vazhdimisht informacione që lidhen me vetëvrasjen ose vetëlëndimin, njoftoi rrjeti sot.

Njoftimet do t'u dërgohen prindërve me anë të email-it ose mesazhit me tekst në telefonin e tyre celular, varësisht nga zgjedhja e bërë gjatë regjistrimit. Pasi të merret njoftimi, aplikacioni do të sugjerojë gjithashtu një numër telefoni për urgjencë ose këshilla, në bashkëpunim me ofruesit e kujdesit shëndetësor, se si ta diskutojnë çështjen me fëmijën e tyre.

Ky sistem do të aktivizohet duke filluar nga java e ardhshme në Shtetet e Bashkuara, Britaninë e Madhe, Australi dhe Kanada, dhe do të shtrihet në rajone të tjera anembanë botës më vonë këtë vit.

"Ndonjëherë mund t'i informojmë prindërit pa pasur një rrezik real," shpjegoi dega e Meta Group, "por ne besojmë - dhe ekspertët pajtohen - se kjo është një pikënisje e mirë."

Kjo iniciativë është pjesë e një sërë masash të miratuara nga platformat në vitet e fundit për të mbrojtur më mirë përdoruesit e rinj.

Një padi është aktualisht në pritje në Los Angeles kundër platformave Instagram të Meta dhe YouTube të Google, të akuzuara nga një grua e re se i kanë shkaktuar depresionin, ankthin dhe çrregullimin dismorfik trupor.

Paditësja, e njohur vetëm si "Kaylee J.M.", filloi të përdorte Instagram në moshën 9 vjeç dhe YouTube në moshën 6 vjeç. Avokatët e saj argumentojnë se kompanitë kërkuan të rrisnin fitimet e tyre duke i varur fëmijët nga shërbimet e tyre, pavarësisht se e dinin se mediat sociale mund të dëmtonin shëndetin e tyre mendor.

"Kaylie J.M." është planifikuar të dëshmojë sot.

Platformat i mohojnë akuzat dhe thonë se provat në këtë rast nuk mbështesin pretendimet e gruas ./Lajmi i Fundit