Izraeli: Goditëm një automjet në jug të Libanit, përbënte kërcënim të menjëhershëm

Forcat Mbrojtëse të Izraelit (IDF) kanë njoftuar se kanë goditur një automjet në jug të Libanit, duke deklaruar se ai përbënte një kërcënim të menjëhershëm për trupat e tyre në terren.

Sipas ushtrisë izraelite, janë identifikuar dy automjete që po largoheshin nga një strukturë ushtarake e lidhur me Hezbollahun. Autoritetet ushtarake pretendojnë se personat në këto mjete kishin shkelur armëpushimin dhe kishin kaluar vijën e mbrojtjes, çka ka çuar në goditjen e njërit prej automjeteve dhe një ndërtese nga ku ishin nisur.

Ngjarja vjen pas raportimeve nga mediat shtetërore libaneze për dy viktima nga një sulm ajror në fshatin al-Tir, në jug të vendit.

IDF ka bërë gjithashtu të ditur se ka pasur raportime për plagosjen e dy gazetarëve gjatë incidentit, duke theksuar se nuk synon gazetarët dhe nuk pengon ekipet e shpëtimit të arrijnë në vendngjarje. Hetimet për rrethanat e sulmit vijojnë.