Trump nderohet me Çmimin e Izraelit: Kontribut i veçantë për popullin hebre

Presidenti i SHBA-së, Donald Trump, është nderuar me Çmimin e Izraelit (Israel Prize), një nga vlerësimet më të larta civile në vend, në kategorinë “kontribut i veçantë për popullin hebre”.

Vendimi është bërë publik nga ministri i Arsimit i Izraelit, Yoav Kisch, i cili e cilësoi këtë një “vendim historik” që njeh kontributin e Trump në marrëdhëniet me Izraelin dhe popullin hebre.

Sipas autoriteteve izraelite, çmimi vjen si vlerësim për disa hapa të ndërmarrë gjatë presidencës së tij, përfshirë mbështetjen për sigurinë e Izraelit, luftën kundër antisemitizmit dhe njohjen e Jerusalemit si kryeqytet të vendit.

Lajmi është konfirmuar edhe nga kryeministri Benjamin Netanyahu, i cili theksoi se është hera e parë që një lider i huaj dhe president jo-izraelit nderohet me këtë çmim në historinë 78-vjeçare të shtetit të Izraelit.

Sipas njoftimeve, Trump pritet të vizitojë Izraelin në muajt e ardhshëm, ku do të mbahet edhe ceremonia zyrtare e dorëzimit të çmimit.