Ngërçi në Hormuz rrit rrezikun e rikthimit në luftë të hapur mes SHBA dhe Iranit

Përplasja mes Shteteve të Bashkuara dhe Iranit po hyn në një fazë të re të rrezikshme, ndërsa kontrolli mbi Ngushticën e Hormuzit po shndërrohet në pikën më të nxehtë të krizës në Gjirin Persik.

Sipas një analize të Jeremy Bowen, armëpushimi i vendosur katër javë më parë po jep shenja dobësimi, ndërsa përpjekjet diplomatike mes Uashingtonit dhe Teheranit kanë ngecur.

Takimet e fundit mes përfaqësuesve amerikanë dhe iranianë në Islamabad nuk kanë prodhuar rezultat konkret, ndërsa ndërmjetësimi i Pakistanit nuk ka sjellë progres të dukshëm.

Në qendër të tensioneve mbetet Ngushtica e Hormuzit, një korridor kyç për transportin global të naftës dhe gazit. Pas sulmeve të SHBA-ve dhe Izraelit ndaj Iranit, Teherani ka përdorur kontrollin mbi këtë zonë si instrument presioni strategjik dhe ekonomik.

Ministri i Jashtëm iranian, Abbas Araghchi, ka deklaruar se nuk do të ketë rikthim në situatën e mëparshme, duke sinjalizuar vijimin e përplasjes.

Ndërkohë, presidenti amerikan Donald Trump ka urdhëruar marinën amerikane të shoqërojë anijet tregtare në Ngushticën e Hormuzit, një lëvizje që synon garantimin e lirisë së lundrimit, por që mund të sjellë reagime të reja nga Irani.

Kriza po reflektohet edhe në tregjet globale, me rritje të çmimeve të energjisë dhe shqetësime për furnizimin me naftë, gaz dhe lëndë të para industriale.

Ekspertët paralajmërojnë se një bllokim i zgjatur i Hormuzit mund të ndikojë edhe zinxhirët globalë të furnizimit me ushqime për shkak të mungesës së plehrave kimike.

Një tjetër pikë e ndjeshme mbetet Porti i Fujairah në Emiratet e Bashkuara Arabe, i cili konsiderohet objektiv strategjik për Iranin.

Analistët paralajmërojnë se çdo incident i ri në rajon mund të sjellë një përshkallëzim të ri ushtarak me pasoja globale.