Ndër më të paguarit në Europian, ja sa është rroga e trajnerit të Kombëtares, Sylvinhos!

Trajneri i Kombëtares shqiptare, Silvinjo, nuk është vetëm në qendër të vëmendjes për performancën e ekipit në fushë, por edhe për kontratën e tij financiare mjaft bujare.

Aktualisht, braziliani përfiton një pagë vjetore prej rreth 1.1 milionë eurosh, ndërsa stafi i tij teknik, ku përfshihen emra të njohur si Pablo Zabaleta dhe Doriva, përfiton edhe 400 mijë euro të tjera, duke e çuar totalin në 1.5 milionë euro në vit.

Kjo shumë e rendit Silvinjon në mesin e trajnerëve më të paguar që drejtojnë ekipe kombëtare pjesëmarrëse në Euro 2024. Për krahasim, trajneri i Gjeorgjisë, Willy Sagnol, merr një pagë modeste prej vetëm 200 mijë eurosh, ndërsa paga e Silvinjos e kalon me shumëfish atë të kolegëve nga vende si Polonia, Sllovakia, Hungaria, Skocia dhe Çekia, ku shifrat varionin rreth 300 mijë euro.

Kur u emërua në krye të kuqezinjve, paga e Silvinjos ishte rreth 750 mijë euro, por suksesi i tij në kualifikueset e Kampionatit Europian dhe ringjallja e frymës pozitive në ekipin kombëtar kanë ndikuar në rinegociimin e kontratës.

Kontrata e Silvinjos nuk është thjesht një shifër në letër, por edhe një tregues i besimit që Federata Shqiptare e Futbollit ka vendosur te projekti brazilian. Me një staf të përgatitur dhe një grup lojtarësh në rritje, Shqipëria ka ambicie reale për të bërë një paraqitje dinjitoze në Euro 2024.